Ex-AIADMK Minister Vellamandi Natarajan Joins TVK | Trichy Insight
திருச்சி அதிமுகவின் சீனியர் புள்ளியும், முன்னாள் சுற்றுலாத்துறை அமைச்சருமான வெல்லமண்டி நடராஜன் திடீரென விஜய் தலைமையிலான தமிழக வெற்றிக் கழகத்தில் இணைந்துள்ளார்.
மே 28, 2026: தமிழக அரசியல் களம் அடுத்தடுத்த அதிரடி திருப்பங்களை சந்தித்து வரும் நிலையில், திருச்சியின் மிக முக்கிய அரசியல் முகங்களில் ஒருவரான அதிமுக முன்னாள் அமைச்சர் வெல்லமண்டி நடராஜன் நேற்று இரவு தமிழக வெற்றிக் கழகத்தில் (தவெக) அதிகாரப்பூர்வமாக இணைந்துள்ளார். சென்னையில் தவெக பொதுச்செயலாளர் புஸ்ஸி ஆனந்தை நேரில் சந்தித்த அவர், அக்கட்சியில் தன்னை இணைத்துக் கொண்டார். இந்த திடீர் அரசியல் மாற்றம் திருச்சி மாவட்ட அதிமுக வட்டாரத்திலும், ஒட்டுமொத்த தமிழக அரசியல் வட்டாரத்திலும் பெரும் பரபரப்பை ஏற்படுத்தியுள்ளது. 1972 ஆம் ஆண்டு முதல் அதிமுகவில் நீண்ட காலம் பயணித்த வெல்லமண்டி நடராஜன், திருச்சியின் சீனியர் தலைவர்களில் ஒருவராக வலம் வந்தவர் என்பது குறிப்பிடத்தக்கது.
கடந்த 2016 சட்டமன்றத் தேர்தலில் திருச்சி கிழக்கு தொகுதியில் போட்டியிட்டு வெற்றி பெற்று, மறைந்த முன்னாள் முதல்வர் ஜெயலலிதா அமைச்சரவையில் சுற்றுலாத்துறை அமைச்சராகப் பதவி வகித்தார் வெல்லமண்டி நடராஜன். அதன்பின்னர் கட்சியில் ஏற்பட்ட பல்வேறு உட்கட்சி பூசல்கள் மற்றும் அரசியல் நகர்வுகளின் தொடர்ச்சியாக அவர் தற்போது இந்த அதிரடி முடிவை எடுத்துள்ளதாக அரசியல் வட்டாரங்கள் தெரிவிக்கின்றன. சமீபகாலமாக அதிமுகவிலிருந்து முக்கிய நிர்வாகிகள் பலர் விலகி மாற்று கட்சிகளுக்கு சென்று வரும் சூழலில், வெல்லமண்டி நடராஜன் தவெகவை தேர்ந்தெடுத்துள்ளது அக்கட்சிக்கு திருச்சியில் எந்த அளவுக்கு பலத்தை தரும் என்ற விவாதங்களும் தற்போது எழுந்துள்ளன.
குறிப்பாக திருச்சி மத்திய பேருந்து நிலையம், சத்திரம், தில்லை நகர் உள்ளிட்ட திருச்சி கிழக்கு தொகுதிக்குட்பட்ட பகுதிகளில் இவருக்கு இருக்கும் பழைய செல்வாக்கு, வரும் காலங்களில் தவெகவின் வளர்ச்சிக்கு எந்த அளவுக்கு அடித்தளமாக அமையப்போகிறது என்பதை பொறுத்திருந்துதான் பார்க்க வேண்டும். புதிய அரசியல் பயணத்தை தொடங்கியுள்ள வெல்லமண்டி நடராஜன், தவெக தலைவர் விஜய்யின் கொள்கைகள் மற்றும் தற்போதைய அரசியல் நகர்வுகள் தன்னை வெகுவாக கவர்ந்ததால் இந்த முடிவை எடுத்ததாக நெருங்கிய வட்டாரங்கள் தரப்பில் சொல்லப்படுகிறது.
திருச்சியில் நீண்ட கால அரசியல் அனுபவம் கொண்ட ஒரு மூத்த தலைவர் தவெகவில் இணைந்திருப்பது, மாவட்டத்தில் உள்ள மற்ற கட்சிகளின் நிர்வாகிகளையும் தவெக நோக்கி யோசிக்க வைத்துள்ளதாக தற்போதைய கள நிலவரங்கள் தெரிவிக்கின்றன. எது எப்படியோ, இவரின் இந்த திடீர் தவெக பிரவேசம் திருச்சி மாவட்ட அரசியல் களத்தில் ஒரு புதிய சலசலப்பை ஏற்படுத்தியிருப்பது மட்டும் உண்மை.
Hashtags: #TrichyInsight #TrichyNews #VellamandiNatarajan #TVK #TamilagaVettriKazhagam #Vijay #AIADMK #TrichyPolitics #TamilNaduPolitics #BreakingNews #TrichyEast #PoliticalUpdate
Socials: Handles: @trichyinsight @trichyinsight