லால்குடி கிணற்றில் தலையில்லா சடலம் மர்மம் | Trichy Insight
திருச்சி லால்குடி அருகே பாழடைந்த கிணற்றில் கடலூரைச் சேர்ந்த அண்ணன், தம்பி இருவர் கொடூரமான முறையில் சடலமாகக் கண்டெடுக்கப்பட்ட சம்பவம் திருச்சியில் பெரும் பரபரப்பை ஏற்படுத்தியுள்ளது.
08 July 2026: திருச்சி மாவட்டம் லால்குடி அருகே உள்ள ஆதிகுடி கிராமத்தில் இருக்கும் ஒரு விவசாயத் தோட்டத்தில் 30 அடி ஆழமுள்ள பாழடைந்த கிணறு ஒன்று உள்ளது. இந்த கிணற்றுப் பகுதியிலிருந்து நேற்றுமுன்தினம் மாலை நேரத்தில் கடுமையான துர்நாற்றம் வீசியுள்ளது. இதனால் சந்தேகமடைந்த அப்பகுதி மக்கள் உடனடியாக லால்குடி போலீசாருக்கு தகவல் கொடுத்தனர். தகவலறிந்து சம்பவ இடத்திற்கு விரைந்து வந்த போலீசார், லால்குடி தீயணைப்பு நிலைய வீரர்களின் உதவியோடு கிணற்றுப் பகுதியைச் சோதனையிட்டனர். அப்போது கிணற்றின் அருகே இரண்டு கைலிகள், இரண்டு டி-சர்ட்டுகள், இரண்டு ஜோடி செருப்புகள், ஒரு செல்போன், அரிவாள் மற்றும் கடப்பாரை ஆகியவை கிடப்பதைக் கண்டு போலீசார் அதிர்ச்சியடைந்தனர்.
இதையடுத்து தீயணைப்பு வீரர்கள் கிணற்றுக்குள் இறங்கிப் பார்த்தபோது, அங்கே இரண்டு பேரின் உடல்கள் தலைகுப்புற அழுகிய நிலையில் மிதப்பது தெரியவந்தது. இதில் மிகவும் கொடூரமான விஷயம் என்னவென்றால், மீட்கப்பட்ட இரண்டு உடல்களில் ஒரு உடல் தலையே இல்லாமல் கிடந்துள்ளது. போலீசார் உடனடியாக இரண்டு உடல்களையும் மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்தனர். போலீசாரின் முதற்கட்ட விசாரணையில், சடலமாக மீட்கப்பட்டவர்கள் கடலூர் மாவட்டத்தைச் சேர்ந்த ராஜா என்பவருடைய மகன்களான வெற்றிமணி மற்றும் வீரமணி என்பது தெரியவந்துள்ளது.
இறந்துபோன இந்த அண்ணன், தம்பி இருவரும் லால்குடி அருகே உள்ள பச்சாம்பேட்டை கிராமத்தில் தங்கி, அங்குள்ள ஒரு செங்கல் சூளையில் தொழிலாளர்களாக வேலை பார்த்து வந்துள்ளனர். இவர்களில் மூத்தவரான வெற்றிமணிக்கு மனைவியும் குழந்தைகளும் உள்ளனர், அவர்கள் கடலூரில் வசித்து வருகிறார்கள். தம்பியான வீரமணியின் மனைவி அவரை பிரிந்து சென்றதால், அவர் தனது அண்ணனுடனேயே தங்கி வேலை பார்த்து வந்துள்ளார். கடந்த மே மாதம் 5-ஆம் தேதி தங்களுக்கு சொந்த ஊருக்குச் செல்வதாகச் சொல்லிவிட்டு செங்கல் சூளை உரிமையாளரிடம் அனுமதி கேட்டு இருவரும் கிளம்பியுள்ளனர். ஆனால், அவர்கள் ஊருக்கும் போகவில்லை, வேலைக்கும் திரும்பவில்லை என்பது விசாரணையில் அம்பலமாகியுள்ளது.
தற்போது போலீசார் இந்த கொடூர மரணங்கள் குறித்து பல்வேறு கோணங்களில் விசாரணையை முடுக்கிவிட்டுள்ளனர். உயிரிழந்த சகோதரர்கள் இருவருக்குமே கடுமையான கடன் தொல்லை இருந்ததாகவும், அத்தோடு அவர்களுக்கு கஞ்சா குடிக்கும் பழக்கம் இருந்ததாகவும் போலீசார் தரப்பில் கூறப்படுகிறது. சடலங்கள் கண்டெடுக்கப்பட்ட அந்த ஆதிகுடி கிராமத்துத் தோட்டத்தில் திருட்டுத்தனமாக கஞ்சா விற்பனை செய்யப்பட்டு வந்ததாகத் தகவல்கள் வெளியாகியுள்ளன. இதனால் கஞ்சா வாங்க வந்த இடத்தில் கும்பலுக்குள் ஏற்பட்ட மோதலில் இருவரும் வெட்டி படுகொலை செய்யப்பட்டார்களா அல்லது கடன் தொல்லையால் தற்கொலை செய்துகொண்டார்களா என்ற சந்தேகம் எழுந்துள்ளது.
கிணற்றில் மீட்கப்பட்ட இரண்டு உடல்களுமே பல நாட்கள் ஆகிவிட்டதால் முற்றிலும் அழுகிய நிலையில் காணப்படுகின்றன. இதனால், ஒருவருடைய தலை மட்டும் தனியாகப் பிய்ந்து கிணற்றுக்குள்ளேயே இருக்கும் சேற்றில் சிக்கியிருக்கலாம் என போலீசார் கருதுகிறார்கள். இதன் காரணமாக நேற்று காலையிலிருந்தே தீயணைப்பு வீரர்கள் மீண்டும் அந்த பாழடைந்த கிணற்றுக்குள் இறங்கி, காணாமல் போன அந்தத் தலையைத் தீவிரமாகத் தேடி வருகிறார்கள். கஞ்சா நடமாட்டம் உள்ள தோட்டத்தில் அண்ணன், தம்பி மர்மமான முறையில் இறந்து கிடந்த இந்த சம்பவம் லால்குடி மற்றும் திருச்சி சுற்றுவட்டாரப் பகுதிகளில் பெரும் அதிர்வலையை ஏற்படுத்தியுள்ளது.
Hashtags: #TrichyInsight #TrichyNews #Lalgudi #TrichyCrime #LalgudiMurder #CrimeInvestigation #TrichyPolice #BreakingNews #TamilNaduCrime #TrichyUpdates #LalgudiNews #FieldReporting
Socials: Handles: @trichyinsight @trichyinsight