திருச்சியில் இன்று நீட் தேர்வு 2026 | Trichy Insight

2026-05-03T04:57:47.571+00:00

திருச்சியில் இன்று நடைபெறும் நீட் தேர்விற்காக 11 மையங்கள் அமைக்கப்பட்டு, 6 ஆயிரத்து 688 மாணவர்கள் தேர்வு எழுத உள்ளனர்.

May 3, 2026. மருத்துவப் படிப்புகளுக்கான தேசிய தகுதி மற்றும் நுழைவுத் தேர்வான நீட் தேர்வு இன்று நாடு முழுவதும் நடைபெறுகிறது. திருச்சிராப்பள்ளி மாவட்டத்திலும் இதற்கான ஏற்பாடுகள் மிகவும் பலமாக செய்யப்பட்டுள்ளன. இன்று மதியம் 2 மணி முதல் மாலை 5 மணி வரை இந்தத் தேர்வு நடைபெற உள்ளது. இதற்காக திருச்சி மாவட்டத்தில் மட்டும் மொத்தம் 11 தேர்வு மையங்கள் ஒதுக்கப்பட்டுள்ளன. இதில் 6 ஆயிரத்து 688 மாணவ மாணவிகள் இன்று தேர்வு எழுதப்போகிறார்கள். தேர்வர்கள் மதியமே மையங்களுக்கு வர வேண்டும் என்பதால் காலை முதலே தேர்வு மையங்களில் பரபரப்பு தொற்றிக்கொண்டது.

திருச்சியில் எந்தெந்த இடங்களில் தேர்வு நடக்கிறது என்பதைப் பார்த்தால், புதுக்கோட்டை மெயின் ரோட்டில் உள்ள அண்ணா பல்கலைக்கழகத்தின் பிட் வளாகத்தில் இருக்கும் பொறியியல் கல்லூரியில் ஏ மற்றும் பி என இரண்டு மையங்கள் உள்ளன. இந்த இரண்டு மையங்களிலும் தலா 600 மாணவர்கள் தேர்வு எழுதுகிறார்கள். அதேபோல் துப்பாக்கி தொழிற்சாலை அருகே தஞ்சாவூர் மெயின் ரோட்டில் உள்ள என்ஐடி வளாகத்திலும் ஏ மற்றும் பி என இரண்டு சென்டர்கள் பிரிக்கப்பட்டு அங்கும் தலா 600 பேர் வீதம் 1200 மாணவர்கள் தேர்வில் பங்கேற்கின்றனர்.

நகரின் முக்கிய பகுதியான கருமண்டபம் எல்ஐசி அலுவலகம் எதிரே உள்ள நேஷனல் கல்லூரியிலும் இரண்டு மையங்கள் அமைக்கப்பட்டுள்ளன. அங்கும் தலா 600 மாணவர்கள் ஒதுக்கப்பட்டுள்ளனர். வயலூர் சாலை புத்தூரில் இருக்கும் பிஷப் கல்லூரியிலும் ஏ மற்றும் பி என இரண்டு மையங்களில் தலா 600 மாணவர்கள் தேர்வு எழுதுகின்றனர். காஜாமலை ரேஸ் கோர்ஸ் சாலையில் உள்ள தந்தை பெரியார் அரசு கலை மற்றும் அறிவியல் கல்லூரியில் மையம் ஏ-விற்கு 496 மாணவர்களும், மையம் பி-விற்கு 192 மாணவர்களும் ஒதுக்கப்பட்டுள்ளனர்.

நகரப் பகுதிகள் மட்டுமின்றி புறநகர் பகுதிகளான மண்ணச்சநல்லூர் எதுமலை சாலையில் உள்ள அரசு மாதிரி பெண்கள் மேல்நிலைப் பள்ளி மற்றும் லால்குடி சிறுதையூர் அரசு மேல்நிலைப் பள்ளி ஆகியவற்றிலும் தலா 600 மாணவர்கள் தேர்வு எழுத உள்ளனர். தேர்வு மையங்களில் பலத்த போலீஸ் பாதுகாப்பு போடப்பட்டுள்ளதுடன், மாணவர்கள் கொண்டு வர வேண்டிய ஆவணங்கள் மற்றும் உடைகள் குறித்து கடுமையான கட்டுப்பாடுகள் விதிக்கப்பட்டுள்ளன. இந்தத் தேர்வுக்காக திருச்சி மாவட்ட நிர்வாகம் மற்றும் கல்வித்துறை சார்பில் அனைத்து அடிப்படை வசதிகளும் செய்யப்பட்டுள்ளன.

Hashtags: #TrichyInsight #TrichyNews #NEET2026 #NEETUG #TrichyUpdate #EducationNews #MedicalEntrance #NITTrichy #NationalCollege #Lalgudi #Manachanallur #TrichyExamCenters

Socials: Handles: @trichyinsight @trichynews