திருச்சியில் உல்லாச ஆசை காட்டி ரூ.50 லட்சம் மிரட்டிய பெண் கைது | Trichy Insight
திருச்சியைச் சேர்ந்த பியூட்டி பார்லர் பெண் ஒருவர், காரைக்குடிக்கு உல்லாசமாக இருக்க வரவழைத்து சிவகங்கை பைனான்சியரை நிர்வாணமாக்கி ரூ.50 லட்சம் கேட்டு மிரட்டிய அதிரடி சம்பவம் வெளிச்சத்துக்கு வந்துள்ளது.
July 6, 2026. திருச்சி காட்டூர் பகுதியைச் சேர்ந்த மகேஸ்வரி என்ற பெண் அதே பகுதியில் பியூட்டி பார்லர் நடத்தி வருகிறார். இவருக்கும் சிவகங்கை மாவட்டம் தம்பிபட்டி பகுதியைச் சேர்ந்த 40 வயதான வடிவேல் என்ற பைனான்சியருக்கும் இடையே கடந்த சில மாதங்களுக்கு முன்பு செல்போன் மூலமாக பழக்கம் ஏற்பட்டிருக்கிறது. தனக்கு அவசரமாக பணம் தேவைப்படுகிறது என்று கூறி அடிக்கடி வடிவேலிடம் மகேஸ்வரி பேசி வந்ததாகத் தெரிகிறது. இந்த பழக்கத்தின் அடிப்படையில் கடந்த ஜூன் 9ஆம் தேதி மகேஸ்வரியின் அவசர தேவைக்காக வடிவேல் ரூ.4,500 பணமும் கொடுத்து உதவியிருக்கிறார்.
இதனைத் தொடர்ந்து கடந்த ஜூன் 24ஆம் தேதி வடிவேலை தொடர்பு கொண்ட மகேஸ்வரி, காரைக்குடிக்கு வந்தால் இருவரும் தனிமையில் உல்லாசமாக இருக்கலாம் என்று ஆசை வார்த்தைகளை கூறி அழைத்திருக்கிறார். அந்த ஆசை வலையில் விழுந்த வடிவேல், மகேஸ்வரியின் அழைப்பை ஏற்று உடனடியாக காரைக்குடிக்கு புறப்பட்டுச் சென்றார். அங்கு வந்த வடிவேலை யாருக்கும் சந்தேக வராதபடி காரைக்குடியில் உள்ள ஒரு பழைய ஓட்டு வீட்டிற்கு மகேஸ்வரி அழைத்துச் சென்றுள்ளார்.
வடிவேல் வீட்டுக்குள் சென்ற சில நிமிடங்களிலேயே, அங்கு ஏற்கனவே திட்டமிட்டு மறைந்திருந்த ஒரு மர்ம கும்பல் திடீரென வடிவேலை சூழ்ந்து கொண்டு கொடூரமாக தாக்கத் தொடங்கியது. அந்த கும்பல் வடிவேலை கட்டாயப்படுத்தி ஆடைகளை அவிழ்த்து நிர்வாணமாக்கியதுடன், அதை தங்களது மொபைல் போன்களில் வீடியோவாகவும் பதிவு செய்து கொண்டனர். பின்னர் இந்த வீடியோவை சமூக வலைதளங்களில் வெளியிட்டு மானத்தை வாங்கிவிடுவோம் என்று மிரட்டி, வடிவேலிடம் ரூ.50 லட்சம் பணம் கேட்டு அடித்து துன்புறுத்தியுள்ளனர்.
இந்த கொடூர சம்பவத்தில் இருந்து தப்பித்து வந்த வடிவேல், உடனடியாக காரைக்குடி வடக்கு காவல் நிலையத்தில் நடந்த சம்பவங்கள் குறித்து விரிவாக புகார் அளித்தார். புகாரைப் பெற்றுக் கொண்ட போலீசார் உடனடியாக வழக்குப்பதிவு செய்து, சம்பவம் நடந்த வீட்டின் சுற்றுவட்டாரப் பகுதிகளில் வைக்கப்பட்டிருந்த சிசிடிவி கேமரா பதிவுகளை தீவிரமாக ஆய்வு செய்தனர். சிசிடிவி காட்சிகளின் அடிப்படையில் குற்றவாளிகளை போலீசார் துல்லியமாக அடையாளம் கண்டனர்.
இதையடுத்து இந்த ஹனி டிராப் திட்டத்திற்கு மூளையாக செயல்பட்ட திருச்சி காட்டூரைச் சேர்ந்த பியூட்டி பார்லர் பெண் மகேஸ்வரி மற்றும் அவருக்கு துணையாக இருந்த அவரது கூட்டாளி தமிழ்ச்செல்வன் ஆகிய இருவரையும் போலீசார் அதிரடியாக கைது செய்தனர். மேலும் இந்த கொடூர கடத்தல் மற்றும் மிரட்டல் சம்பவத்தில் தொடர்புடைய தலைமறைவாக உள்ள மேலும் 3 குற்றவாளிகளை போலீசார் தனிப்படை அமைத்து தீவிரமாக தேடி வருகின்றனர். திருச்சியில் பியூட்டி பார்லர் நடத்தி வந்த பெண் இப்படி ஒரு மோசடியில் ஈடுபட்டது பெரும் பரபரப்பை ஏற்படுத்தியுள்ளது.
Hashtags: #TrichyInsight #TrichyNews #Trichy #Kattur #HoneyTrap #TrichyCrime #Karaikudi #Sivagangai #PoliceArrest #CrimeUpdates #TrichyUpdates #AlertNews
Socials: Handles: @trichyinsight @trichyinsight