Trichy Corporation 65 Wards E-Sevai Maiyam Delay | Trichy Insight

2026-06-19T04:31:12.213+00:00

திருச்சி மாநகராட்சியின் 65 வார்டுகளிலும் பல லட்சம் ரூபாய் செலவில் பல்நோக்கு சேவை மையங்கள் கட்டப்பட்டும், அதிலுள்ள இ-சேவை மையங்கள் இன்னும் திறக்கப்படாமல் முடங்கிக் கிடப்பது மக்களிடையே அதிருப்தியை ஏற்படுத்தியுள்ளது.

19-06-2026: திருச்சி மாநகராட்சிக்கு உட்பட்ட 65 வார்டுகளிலும் வசிக்கும் பொதுமக்களின் அத்தியாவசியத் தேவைகளை வார்டு அளவிலேயே எளிதாக முடித்துக் கொடுக்கும் நோக்கில் பல்நோக்கு சேவை மையங்கள் கட்டப்பட்டன. ஆனால், இந்த வளாகங்களில் அமைய வேண்டிய இ-சேவை மையங்கள் (E-Sevai Maiyams) இன்னும் செயல்பாட்டிற்கு வராததால், திட்டத்தின் உண்மையான நோக்கம் நிறைவேறாமல் முடங்கிக் கிடப்பதாகப் பொதுமக்கள் கவலை தெரிவித்துள்ளனர்.

கடந்த 2022-23 ஆம் ஆண்டு மாநகராட்சி பட்ஜெட்டில், திருச்சியின் ஒவ்வொரு வார்டுக்கும் தலா 1,000 சதுர அடி பரப்பளவில் சுமார் 25 லட்சம் ரூபாய் மதிப்பீட்டில் இந்த பல்நோக்கு சேவை மையங்களை அமைக்க நிதி ஒதுக்கீடு செய்யப்பட்டது. இந்த நவீனக் கட்டடங்களில் அந்தந்த வார்டு கவுன்சிலர் அலுவலகம், வருவாய் ஆய்வாளர், வரி வசூல் அலுவலர் மற்றும் சுகாதார ஆய்வாளர்களுக்கான தனித்தனி அறைகளும், தூய்மைப் பணியாளர்களின் உபகரணங்களை வைக்க பாதுகாப்பான கிடங்குகளும் அமைக்கப்பட்டுள்ளன.

கடந்த இரண்டு ஆண்டுகளாகத் தீவிரமாக நடந்த கட்டுமானப் பணிகள் தற்போது 65 வார்டுகளிலும் முழுமையாக நிறைவடைந்து, பல வார்டுகளில் கட்டடங்கள் திறக்கப்பட்டுவிட்டன. இந்த மையங்கள் மூலம் பொதுமக்கள் தங்களின் வார்டு பிரச்னைகளுக்காக அலைந்து திரிந்து மண்டல அலுவலகங்களுக்கோ அல்லது மாநகராட்சி பிரதான அலுவலகத்திற்கோ செல்ல வேண்டிய அலைச்சல் பெருமளவு குறைந்தது. ஆனால், இவ்வளவு வசதிகள் இருந்தும் டிஜிட்டல் சேவைகளுக்கான இ-சேவை மையங்கள் மட்டும் இன்னும் பூட்டியே கிடக்கின்றன.

இதுகுறித்து விசாரித்த போது, இந்த இ-சேவை மையங்கள் மாவட்ட ஆட்சியரகத்தின் (District Collectorate) நேரடிக் கட்டுப்பாட்டின் கீழ் இயங்க வேண்டும் என்பதால், மாவட்ட நிர்வாகத்தின் அனுமதி மற்றும் தொடக்கப் பணிகளில் ஏற்பட்டுள்ள தாமதமே இதற்கு முக்கியக் காரணம் எனத் தெரியவந்துள்ளது. இதுபற்றி திருச்சி மாநகராட்சியின் 23-ஆவது வார்டு மாமன்ற உறுப்பினரும், வரிவிதிப்பு மற்றும் நிதிக் குழு உறுப்பினருமான க.சுரேஷ்குமார் கூறுகையில், இ-சேவை மையங்கள் இன்னும் செயல்படாமல் இருப்பது பெரிய குறையாக உள்ளது என்றும், இவை திறக்கப்பட்டால் தான் அரசு மற்றும் மாநகராட்சி சேவைகள் மக்களுக்கு நேரடியாகவும் எளிதாகவும் கிடைக்கும் என்றும் வலியுறுத்தியுள்ளார். தற்போது இந்த இ-சேவை மையங்களை விரைந்து திறக்கக் கோரி மாவட்ட ஆட்சியரிடம் மனு அளிக்கப்பட்டுள்ளது.

Hashtags: #TrichyInsight #TrichyNews #ESevaiMaiyam #TrichyCorporation #PublicIssue #WardServiceCentre #TrichyCollector #AdministrativeDelay #LocalIssues #RockfortCity

Socials: Handles: @trichyinsight @trichyinsight