திருச்சியில் சிறுமிக்கு பாலியல் தொல்லை: ஓட்டுநர் கைது | Trichy Insight

2026-06-04T04:17:04.122+00:00

திருச்சி காந்தி மார்க்கெட் பகுதியில் 16 வயது சிறுமி கூட்டு பாலியல் பலாத்காரம் செய்யப்பட்டதாக பரவிய வதந்திக்கு திருச்சி மாநகர காவல் துறை திட்டவட்டமான மறுப்பு தெரிவித்து விளக்கம் அளித்துள்ளது.

ஜூன் 4, 2026: திருச்சி காந்தி மார்க்கெட் காவல் எல்லைக்குட்பட்ட பகுதியில் 16 வயது சிறுமி ஒருவருக்கு கூட்டு பாலியல் துன்புறுத்தல் செய்யப்பட்டதாக சமூக வலைதளங்களில் கடந்த சில மணிநேரங்களாக அதிர்ச்சியூட்டும் செய்திகள் மற்றும் வதந்திகள் வேகமாக பரவி வந்தன. இந்த விவகாரம் பொதுமக்கள் மத்தியில் பெரும் பரபரப்பையும் அச்சத்தையும் ஏற்படுத்திய நிலையில் திருச்சி மாநகர காவல் துறை இதுகுறித்து அதிகாரப்பூர்வமாக களமிறங்கி தீவிர விசாரணை நடத்தியது.

போலீசாரின் முதற்கட்ட விசாரணையில் சமூக வலைதளங்களில் பரவிய செய்திகளில் உண்மை இல்லை என்பது தெரியவந்துள்ளது. சிவகங்கையைச் சேர்ந்த ஒரு கார் ஓட்டுநர் அந்த 16 வயது சிறுமியின் நண்பர் வீட்டுக்கு வந்துள்ளார். அப்போது அந்த கார் ஓட்டுநர் கடுமையான மது போதையில் இருந்ததாகக் கூறப்படுகிறது. போதை தலைக்கேறிய நிலையில் இருந்த அவர் அந்த சிறுமியைத் தனது காரில் ஏற்றிச் சென்று அவருக்கு பாலியல் ரீதியாக துன்புறுத்தல் கொடுத்துள்ளார்.

இருப்பினும் சமூக வலைதளங்களில் பரவியது போல இதில் எந்தவிதமான கூட்டு பாலியல் பலாத்கார சம்பவமும் நடக்கவில்லை என்பதை திருச்சி மாநகர காவல் துறை தங்களது அதிகாரப்பூர்வ செய்திக்குறிப்பில் மிகத் தெளிவாக உறுதிப்படுத்தியுள்ளது. பாலியல் தொல்லை கொடுத்த பிறகு அந்த கார் ஓட்டுநர் சிறுமியை கீழக்கரை பஜாரில் உள்ள சிறுமியின் வீட்டிற்கு அருகிலேயே இறக்கிவிட்டு தப்பிச் சென்றுள்ளார்.

பாதிக்கப்பட்ட அந்த 16 வயது சிறுமி தற்போது திருச்சி அரசு பொது மருத்துவமனையில் உள்நோயாளியாக அனுமதிக்கப்பட்டு தீவிர சிகிச்சை பெற்று வருகிறார். அவருக்கு தேவையான அனைத்து மருத்துவ உதவிகளும் தொடர்ந்து வழங்கப்பட்டு வருகின்றன. மேலும் இந்த விவகாரத்தில் பொதுமக்கள் யாரும் தேவையில்லாத வதந்திகளை நம்ப வேண்டாம் என்றும் போலீசார் கேட்டுக்கொண்டுள்ளனர்.

இந்த அதிர்ச்சி சம்பவம் தொடர்பாக கோட்டை அனைத்து மகளிர் காவல் நிலையத்தில் உடனடியாக வழக்குப்பதிவு செய்யப்பட்டுள்ளது. குற்றவாளியான அந்த கார் ஓட்டுநர் மீது பாரதிய நியாய சன்ஹிதா பிரிவு 87 BNS 3 மற்றும் போக்சோ சட்டம் 2012 இன் கீழ் (u/s 4 of 5 (i) r/w 6 of POCSO Act) கடுமையான பிரிவுகளில் வழக்குப்பதிவு செய்யப்பட்டு அவர் அதிரடியாக கைது செய்யப்பட்டுள்ளார்.

Hashtags: #TrichyInsight #TrichyNews #TrichyCityPolice #Trichy #CrimeNews #POCSO #TamilNews #BreakingNews #TrichyDistrict #LawAndOrder

Socials: @trichyinsight @trichyinsight