Trichy Manapparai Love Marriage Girl Kidnapped Video | Trichy Insight

2026-07-05T02:25:34.46+00:00

திருச்சி - திண்டுக்கல் தேசிய நெடுஞ்சாலையில் ஆட்டோவில் சென்று கொண்டிருந்த காதல் திருமணப் பெண்ணை அவரது தந்தையின் ஆட்கள் நடுரோட்டில் கடத்திய பகீர் வீடியோ வைரலாகி வருகிறது.

05-07-2026 திருச்சி மாவட்டம் மணப்பாறையை அடுத்த திருச்சி - திண்டுக்கல் தேசிய நெடுஞ்சாலையில் நேற்று பகல் நேரத்தில் சினிமா பாணியில் அரங்கேறிய ஒரு நேரடி கடத்தல் சம்பவம் ஒட்டுமொத்த மாவட்டத்தையும் அதிர வைத்துள்ளது. மணப்பாறை அருகே உள்ள பாலப்பட்டி பிரிவு பெட்ரோல் பங்க் பகுதியில் இந்த கொடூர சம்பவம் நடந்துள்ளது. காதலித்த இளைஞரை வீட்டின் எதிர்ப்பையும் மீறி அண்மையில் கரம்பிடித்த இளம் பெண் ஒருவர் நேற்று ஒரு ஆட்டோவில் பயணம் செய்து கொண்டிருந்த போது இந்த கடத்தல் சம்பவம் அரங்கேறியுள்ளது.

பெண்ணின் காதல் திருமணத்தை ஏற்றுக்கொள்ள முடியாத அவரது தந்தை, ஆட்களை ஏவி மகளைக் கடத்தப் பக்கா ஸ்கெட்ச் போட்டுள்ளார். அதன்படி பாலப்பட்டி பிரிவு பெட்ரோல் பங்க் அருகே ஆட்டோ வந்து கொண்டிருந்த போது, திட்டமிட்டபடி காரில் வந்த தந்தை மற்றும் அவரது அடியாட்கள் கும்பல் ஆட்டோவை நடுரோட்டில் வழிமறித்துள்ளது. பின்னர் ஆட்டோவுக்குள் இருந்த இளம் பெண்ணை அவரது கணவர் மற்றும் ஆட்டோ ஓட்டுநரின் கண் முன்னாலேயே வலுக்கட்டாயமாக இழுத்துச் சென்று காரில் ஏற்றி கடத்தியுள்ளனர்.

நடுரோட்டில் நடந்த இந்த பகீர் கடத்தல் சம்பவத்தைக் கண்டு அங்கிருந்த பொதுமக்கள் மற்றும் பெண்ணின் கணவர் கடும் அதிர்ச்சி அடைந்தனர். கார் மின்னல் வேகத்தில் மறைந்ததைத் தொடர்ந்து, பாதிக்கப்பட்டவர்கள் உடனடியாக மணப்பாறை காவல் நிலையத்திற்கு விரைந்து சென்று தங்களின் உயிருக்கு ஆபத்து இருப்பதாகக் கூறி அவசரப் புகார் அளித்தனர். இந்த புகாரின் பேரில் மணப்பாறை போலீசார் உடனடியாக வழக்குப் பதிவு செய்து, தேசிய நெடுஞ்சாலைகளில் உள்ள அனைத்து செக்போஸ்டுகளுக்கும் வயர்லெஸ் மூலம் தகவல் அனுப்பி காரைத் தீவிரமாகத் தேடி வந்தனர்.

இதற்கிடையில் இந்த கடத்தல் சம்பவம் நடந்த போது அங்கிருந்தவர்கள் எடுத்த நேரடி வீடியோ காட்சிகள் தற்போது சமூக வலைத்தளங்களில் வெளியாகி பயங்கரமாக வைரலாகி வருகிறது. ஆட்டோவை வழிமறித்து பெண்ணைக் காரில் தூக்கிப் போடும் அந்த அதிர்ச்சி வீடியோ காட்சிகள் திருச்சி பொதுமக்கள் மத்தியில் பெரும் பரபரப்பையும் அச்சத்தையும் ஏற்படுத்தியுள்ளது. இந்த வீடியோ ஆதாரங்களை வைத்தும், கார் நம்பரை வைத்தும் மணப்பாறை போலீசார் தனிப்படை அமைத்துத் தேடுதல் வேட்டையைத் தீவிரப்படுத்தியுள்ளனர். சட்டம் ஒழுங்கைச் சீர்குலைக்கும் இது போன்ற சம்பவங்களில் ஈடுபடுவோர் மீது கடுமையான நடவடிக்கை எடுக்கப்படும் என போலீசார் எச்சரித்துள்ளனர்.

Hashtags: #TrichyInsight #TrichyNews #Manapparai #KidnappingVideo #ViralVideo #TrichyCrime #HighwayKidnap #LoveMarriage #TrichyDistrict #TrichyPolice #TrendingTrichy #TrichyCity

Socials: Handles: @trichyinsight @trichyinsight