மே தின விடுமுறை விதிமீறல்: 110 நிறுவனங்கள் மீது அதிரடி | Trichy Insight
மே தினத்தில் தொழிலாளர்களுக்கு கட்டாய விடுமுறை அளிக்காத திருச்சி மற்றும் புதுக்கோட்டை மாவட்ட 110 நிறுவனங்கள் மீது தொழிலாளர் துறை சட்டப்பூர்வ நடவடிக்கை எடுத்துள்ளது.
May 2, 2026. உழைப்பாளர்கள் தினமான மே 1-ம் தேதி அரசு பொது விடுமுறையாக அறிவிக்கப்பட்டுள்ள நிலையில் திருச்சி மற்றும் புதுக்கோட்டை மாவட்டங்களில் உள்ள பல்வேறு நிறுவனங்களில் தொழிலாளர் நலத்துறையினர் அதிரடி சோதனைகளை மேற்கொண்டனர். தொழிலாளர் ஆணையர் மற்றும் முதன்மைச் செயலாளர் சி.அ. ராமன் அவர்களின் உத்தரவின் பேரில் திருச்சி கூடுதல் தொழிலாளர் ஆணையர் ஆ. திவ்யநாதன் மற்றும் இணை ஆணையர் வ. லீலாவதி ஆகியோரது அறிவுரையின்படி இந்த ஆய்வு நடத்தப்பட்டது.
திருச்சி தொழிலாளர் உதவி ஆணையர் வெ. தங்கராசு தலைமையில் துணை ஆய்வாளர்கள் மற்றும் உதவி ஆய்வாளர்கள் அடங்கிய குழுவினர் மே 1-ம் தேதி திருச்சி மற்றும் புதுக்கோட்டை மாவட்ட எல்லைக்குட்பட்ட 153 நிறுவனங்களில் தீவிர ஆய்வு மேற்கொண்டனர். இதில் கடை நிறுவனங்கள் உணவு நிறுவனங்கள் மற்றும் மோட்டார் போக்குவரத்து நிறுவனங்கள் என அனைத்து தரப்பு தொழிலகங்களும் கண்காணிக்கப்பட்டன.
இந்த சோதனையின் முடிவில் மே தின விடுமுறை அளிக்காத சுமார் 110 நிறுவனங்கள் கண்டறியப்பட்டு அவை மீது சட்டப்பூர்வ நடவடிக்கை எடுக்கப்பட்டுள்ளது. தேசிய விடுமுறை நாட்களில் தொழிலாளர்களுக்கு விடுமுறை அளிக்க வேண்டியது கட்டாயம் என்றும் ஒருவேளை பணிக்கு அழைத்தால் அவர்களுக்கு இரட்டிப்பு ஊதியம் அல்லது மாற்று விடுமுறை அளிக்கப்பட வேண்டும் என்பது விதிமுறை.
இந்த விதிகளை மீறி இரட்டிப்பு ஊதியமோ அல்லது மாற்று விடுமுறையோ வழங்காமல் தொழிலாளர்களை பணி செய்ய நிர்ப்பந்தித்த நிறுவனங்கள் மீது இனிவரும் காலங்களிலும் கடுமையான நடவடிக்கைகள் தொடரும் என தொழிலாளர் உதவி ஆணையர் வெ. தங்கராசு எச்சரித்துள்ளார். தொழிலாளர்களின் உரிமைகளை பாதுகாப்பதில் சமரசம் இருக்காது என அதிகாரிகள் தரப்பில் தெரிவிக்கப்பட்டுள்ளது.
Hashtags: #TrichyInsight #TrichyNews #MayDay #LabourLaw #TrichyUpdate #TrichyCity #WorkersDay #ActionTaken #Pudukkottai #TNNews #LocalNews #TrendingTrichy
Socials: Handles: @trichyinsight @trichynews