கஞ்சா கும்பலுக்கு துணை போகும் பாலக்கரை போலீஸ் மீது மனு | Trichy Insight
திருச்சி பாலக்கரையில் கஞ்சா மற்றும் போதைப்பொருள் விற்பனை கும்பலுக்கு ஆதரவாக செயல்பட்டு, அதற்கு எதிராக போராடியவர்களை அச்சுறுத்தியதாக பாலக்கரை இன்ஸ்பெக்டர் மற்றும் எஸ்.ஐ மீது கமிஷனர் அலுவலகத்தில் பரபரப்பு புகார் அளிக்கப்பட்டுள்ளது.
திருச்சி ஜூன் 11, 2026: திருச்சி மாநகரப் பகுதியில் கஞ்சா மற்றும் தடை செய்யப்பட்ட போதைப்பொருட்களின் நடமாட்டத்தை தடுக்க கோரி பொதுமக்களும் பல்வேறு அமைப்புகளும் தொடர்ந்து போராடி வரும் நிலையில், பாலக்கரை காவல் துறையினர் மீதே கஞ்சா கும்பலுக்கு துணை போவதாக எழுந்துள்ள குற்றச்சாட்டு திருச்சியில் பெரும் பரபரப்பை ஏற்படுத்தியுள்ளது. போதைப்பொருள் விற்பனை செய்பவர்களுக்கு ஆதரவாக செயல்பட்டது மட்டுமன்றி, அதனை எதிர்த்துப் போராடிய சமூக ஆர்வலர்களை அச்சுறுத்தியதாக பாலக்கரை காவல் நிலைய அதிகாரிகள் மீது திருச்சி மாநகர காவல் ஆணையர் அலுவலகத்தில் இன்று அதிரடியாக மனு அளிக்கப்பட்டுள்ளது.
இந்திய மாதர் தேசிய சம்மேளனத்தின் திருச்சி மாவட்டத் தலைவர் எஸ். பார்வதி மற்றும் மாவட்டச் செயலாளர் ஏ. அஞ்சுகம் ஆகியோர் தலைமையில் இந்த புகார் மனு காவல் ஆணையரிடம் நேரில் வழங்கப்பட்டது. பாலக்கரை காவல் எல்லைக்குட்பட்ட பகுதிகளில் கஞ்சா மற்றும் தடை செய்யப்பட்ட போதைப்பொருட்கள் விற்பனை தடையின்றி நடப்பதாகவும், இதற்கு பாலக்கரை காவல் ஆய்வாளர் (Inspector) சிவசுப்பிரமணியம், உதவி ஆய்வாளர் (SI) ரவிச்சந்திரன் மற்றும் சீருடை அணியாத சில காவலர்கள் முழுமையாக ஆதரவாக செயல்பட்டு வருவதாகவும் அந்த மனுவில் மிகக் கடுமையான குற்றச்சாட்டுகள் முன்வைக்கப்பட்டுள்ளன.
மேலும், இப்பகுதிகளில் நடக்கும் போதைப்பொருள் விற்பனைக்கு எதிராக ஜனநாயக ரீதியில் போராட்டத்தில் ஈடுபட்டவர்களை, சம்பந்தப்பட்ட பாலக்கரை உதவி ஆய்வாளர் ரவிச்சந்திரன் மற்றும் இன்ஸ்பெக்டர் சிவசுப்பிரமணியம் ஆகியோர் ஒருமையில் பேசி, அநாகரீகமான வார்த்தைகளால் அர்ச்சித்து, கடுமையான முறையில் அச்சுறுத்தியதாக போராட்டக்காரர்கள் தரப்பில் தெரிவிக்கப்பட்டுள்ளது. கஞ்சா வியாபாரிகளைப் பிடிப்பதை விட்டுவிட்டு, போதைக்கு எதிராக குரல் கொடுக்கும் தங்களை போலீசாரே மிரட்டுவது எந்த விதத்தில் நியாயம் என்று மனுதாரர்கள் கேள்வி எழுப்பியுள்ளனர்.
இந்த பரபரப்பான புகார் மனு அளிக்கும் நிகழ்வில் இந்திய மாதர் தேசிய சம்மேளனத்தின் பொருளாளர் எம். சுமதி, துணைச் செயலாளர் க. ஆயிஷா, காஜாபேட்டை பகுதி நிர்வாகி ஜெய்லானி ஆகியோர் கலந்து கொண்டனர். இவர்களுடன் இந்திய கம்யூனிஸ்ட் கட்சியின் (CPI) மாவட்ட செயலாளர் எஸ். சிவா, அனைத்திந்திய மாணவர் பெருமன்றத்தின் (AISF) மாநில தலைவர் க. இப்ராஹிம், நிர்வாகக் குழு உறுப்பினர் சொக்கி சண்முகம், பொன்மலை பகுதி செயலாளர் ராஜா, இளைஞர் பெருமன்ற நிர்வாகி என். எஸ். பாட்ஷா, த. விஷ்வா, ஈஸ்வரி மற்றும் செ. விஷ்வா உள்ளிட்ட பல்வேறு இடதுசாரி மற்றும் மாணவர் அமைப்புகளின் முக்கிய நிர்வாகிகள் திரளாக கலந்து கொண்டு, தவறு செய்த பாலக்கரை போலீசார் மீது உடனடியாக துறை ரீதியான ஆக்ஷன் எடுக்க வேண்டும் என வலியுறுத்தினர்.
Socials: #TrichyInsight #TrichyNews #TrichyPolice #PalakaraiPolice #GanjaCase #CommissionerOffice #PublicProtest #TrichyCrime #AntiDrugVigilance #Palakarai #TrichyDistrict
@trichyinsight @trichyinsight