தேசிய கராத்தே போட்டியில் திருச்சி மாணவன் சாதனை! Trichy Insight

2026-06-18T08:18:57.79+00:00

உத்தரகாண்ட் மாநிலம் டெராடூனில் நடைபெற்ற தேசிய அளவிலான கராத்தே போட்டியில், திருச்சியைச் சேர்ந்த 11 வயது மாணவன் ஜெரின் வெண்கலப் பதக்கம் வென்று அசத்தியுள்ளார்.

June 18, 2026. நம்ம திருச்சி மாவட்டத்திற்கு விளையாட்டுத் துறையில் மற்றுமொரு மகுடமாக, உத்தரகாண்ட் மாநிலத்தில் நடைபெற்ற தேசிய அளவிலான கராத்தே போட்டியில் திருவெறும்பூர் பகுதியைச் சேர்ந்த 11 வயது மாணவர் ஒருவர் வெண்கலப் பதக்கம் வென்று அசத்தியுள்ளார். இந்தியாவின் பல்வேறு மாநிலங்களில் இருந்து ஆயிரக்கணக்கான திறமையாளர்கள் மோதிய இந்த கடுமையான போட்டியில், திருச்சியின் இளம் குருத்து பதக்கம் வென்றிருப்பது ஒட்டுமொத்த மாவட்ட மக்களையும் பெருமிதம் கொள்ளச் செய்துள்ளது.

உத்தரகாண்ட் மாநிலத்தின் தலைநகரான டெராடூனில் சமீபத்தில் தேசிய அளவிலான கராத்தே சாம்பியன்ஷிப் போட்டிகள் மிக பிரம்மாண்டமாக நடத்தப்பட்டன. இந்த மெகா தொடரில் இந்தியாவிலுள்ள அனைத்து மாநிலங்கள் மற்றும் யூனியன் பிரதேசங்களில் இருந்து சுமார் 2000-க்கும் மேற்பட்ட மாணவ, மாணவியர்கள் மிகவும் ஆக்ரோஷமாக களமிறங்கி தங்களது திறமைகளை வெளிப்படுத்தினர். இதில் தமிழ்நாடு கராத்தே அணியின் சார்பாக, நம்ம திருச்சியின் திருவெறும்பூர் பிரகாஷ் நகரில் இயங்கி வரும் புகழ்பெற்ற தமிழ் வாரியார் கராத்தே அகாடமியில் இருந்து வீரன் டி. ஜெரின் பங்கேற்றார்.

இந்த தேசிய தொடரில் 11 வயதுக்குட்பட்டோருக்கான மற்றும் பிளஸ் 45 கிலோ எடைப் பிரிவில் மாணவன் ஜெரின் களம் கண்டார். தேசிய அளவில் பல மாநில சாம்பியன்களுடன் மோதிய ஜெரின், தனது அசாத்திய வேகம் மற்றும் நுணுக்கமான கராத்தே யுக்திகளால் எதிராளிகளை திணறடித்து அரையிறுதி வரை முன்னேறி, இறுதியில் வெண்கலப் பதக்கத்தை தட்டிச் சென்றார். தமிழ்நாட்டிற்கும், குறிப்பாக நம்ம திருச்சி மண்ணிற்கும் பெருமை சேர்த்த இந்த இளம் சாதனையாளரின் வெற்றி இப்போது சமூக வலைத்தளங்களில் வைரலாகி வருகிறது.

தேசிய அளவில் பதக்கம் வென்று சாதனை படைத்த மாணவன் ஜெரினுக்கு திருச்சியின் பல்வேறு தரப்பில் இருந்தும் வாழ்த்துகள் குவிந்து வருகின்றன. வெற்றி பெற்ற மாணவனை பாராட்டி அவருடைய கராத்தே பயிற்சியாளரும், தமிழ் வாரியர் கராத்தே அகாடமியின் தலைமை பயிற்சியாளருமான கராத்தே ஆர். சுதாகர், சிறுவனின் பெற்றோர்கள், பள்ளி ஆசிரியர்கள், திருவெறும்பூர் பகுதி சமூக நல ஆர்வலர்கள் மற்றும் பொதுமக்கள் என பலரும் நேரில் சந்தித்து வாழ்த்துகளையும் இனிப்புகளையும் வழங்கி கொண்டாடி வருகின்றனர்.

Hashtags: #TrichyInsight #TrichyNews #TrichySports #KarateChampionship #NationalWinner #Thiruverumbur #Prakash Nagar #KarateTamilnadu #ProudTrichy #YoungAchiever #TrichyUpdates #SportsNews

Socials: Handles: @trichyinsight @trichyinsight