உரையூர் மைதானத்தில் கஞ்சா பயன்படுத்திய சிறுவர்கள் வீடியோ வைரல் | Trichy Insight

2026-07-05T11:45:29.513+00:00

திருச்சி உரையூர் பகுதியில் பட்டப்பகலில் சிறுவர்கள் கஞ்சா பயன்படுத்தும் வீடியோ சமூக வலைத்தளங்களில் வைரலாகி வரும் நிலையில், காவல்துறையினர் தீவிர நடவடிக்கை எடுக்க பொதுமக்கள் கோரிக்கை விடுத்துள்ளனர்.

திருச்சி, ஜூலை 5, 2026: திருச்சி மாநகரப் பகுதிகளில் சமீபகாலமாக இளைஞர்கள் மற்றும் பள்ளி, கல்லூரி மாணவர்களைக் குறிவைத்து விற்கப்படும் போதைப்பொருட்களின் நடமாட்டம் அதிகரித்து வருவது பெரும் கவலையை ஏற்படுத்தியுள்ளது. குறிப்பாக, உரையூர் பகுதியில் உள்ள குடியிருப்புப் பகுதிகளை ஒட்டிய காலி மைதானங்கள் சமூக விரோதிகளின் கூடாரமாக மாறி வருவதாகப் புகார்கள் எழுந்துள்ளன.

இந்நிலையில், உரையூர் விலாயித்ஷா நகர் பகுதியில் உள்ள ஒரு காலி மைதானத்தில், பட்டப்பகலில் இரண்டு சிறுவர்கள் அமர்ந்து கஞ்சா உள்ளிட்ட போதைப்பொருட்களைப் பயன்படுத்தும் அதிர்ச்சியூட்டும் வீடியோ ஒன்று இன்று சமூக வலைத்தளங்களில் வெளியாகி பயங்கர வைரலாகி வருகிறது. அந்த வீடியோவில், அச்சமே இல்லாமல் பொதுவெளியில் சிறுவர்கள் போதைப்பொருள் தயாரித்து பயன்படுத்துவது அப்பட்டமாகத் தெரிகிறது.

இதுகுறித்து அப்பகுதி மக்கள் கூறுகையில், இந்த காலி மைதானத்தில் மாலை மற்றும் இரவு நேரங்களில் விசித்திரமான நபர்கள் மற்றும் சில இளைஞர்கள் கும்பலாகக் கூடி போதைப்பொருட்களைப் பயன்படுத்துவது வாடிக்கையாகிவிட்டது எனத் தெரிவிக்கின்றனர். இதனைத் தட்டிக்கேட்கும் பொதுமக்களை அவர்கள் மிரட்டுவதாகவும், இதனால் இரவு நேரங்களில் பெண்கள் மற்றும் குழந்தைகள் அந்தப் பகுதி வழியாகச் செல்லவே அஞ்சுவதாகவும் பொதுமக்கள் குற்றம் சாட்டுகின்றனர்.

இரவு நேரங்களில் நடந்து வந்த இந்த அவலம், தற்போது பட்டப்பகலிலேயே சிறுவர்கள் கஞ்சா பயன்படுத்தும் அளவிற்கு நிலைமை மோசமாகியிருப்பது உரையூர் பகுதி மக்களை அதிர்ச்சியில் ஆழ்த்தியுள்ளது. இந்த வீடியோ ஆதாரத்தின் அடிப்படையில், திருச்சி மாநகரக் காவல்துறை மற்றும் போதைப்பொருள் தடுப்புப் பிரிவினர் உடனடியாகத் தலையிட்டு, உரையூர் பகுதியில் கஞ்சா விற்பனை செய்யும் கும்பலைக் கண்டறிந்து கடுமையான நடவடிக்கை எடுக்க வேண்டும் என்றும், காலி மைதானங்களில் போலீஸ் ரோந்துப் பணியைத் தீவிரப்படுத்த வேண்டும் என்றும் சமூக ஆர்வலர்கள் கோரிக்கை விடுத்துள்ளனர்.

Hashtags: #TrichyInsight #TrichyNews #Trichy #Woraiyur #GanjaAwareness #PoliceAction #YouthSafety #ViralVideo #TrichyCityPolice #SaveYouth #SocialIssue #BreakingNewsTrichy

Socials: Handles: @trichyinsight @trichyinsight